चुर्रर्रर्रर्र...सिझलर

जिन्नस

• तीन मोठे बटाटे उकडून , दोन मध्यम बटाटे जाड सळ्यांसारखे चिरून
• दोन गाजरे उभी जाड चिरून
• एक मध्यम सिमला मिरची ( हिरवी ) उभे जाड तुकडे करून
• पिवळ्या व लाल रंगाची मध्यम सिमला मिरची उभे जाड तुकडे करून
  
• फ्लॉवरचे मोठे तुरे-तिनशे ग्रॅम
• दोन मध्यम टोमॅटो उभे चार तुकडे करून
• दहा-बारा मश्रूम प्रत्येकी दोन तुकडे करून
• एक मोठी वाटी मक्याचे दाणे, अर्धी वाटी फरसबी जाड तुकडे करून
• एक मध्यम कांदा जाड तुकडे करून
• एक वाटी शिजलेला भात.
• चार मोठे चमचे टोमॅटो सॉस, दोन मिरच्या व मुठभर कोथिंबीर बारीक चिरून
• मीठ, एक चमचा जिरेपूड, तीन चमचे साजूक तूप,
  तीन चमचे तेल.
  

मार्गदर्शन

उकडलेले बटाटे साल काढून मळून घ्यावे. त्यात बारीक चिरलेली कोथिंबीर, हिरवी मिरची, एक चमचा जिरे पूड व चवीपुरते मीठ घालून मळून मध्यम आकाराचे पॅटीस तयार करावे. तव्यावर अगदी जरूरी पुरते तेल सोडून शॅलोफ्राय करून घेऊन बाजूला ठेवावे. एक वाटी मोकळा शिजवलेला भात घ्यावा.

एका कढईमध्ये तीन चमचे तेल घालावे. चांगले तापले की बटाटे, गाजर, फरसबी व फ्लॉवर घालून परतावे. मध्यम आच ठेवावी. पाच मिनिटांनी त्यात मश्रूम, कांदा, मका व सिमला मिरची घालून पुन्हा सगळे पाच मिनिटे परतावे. नंतर त्यात टोमॅटो घालून तिनचार मिनिटे आच थोडी वाढवून परतावे. आता त्यात टोमॅटो सॉस व चवीनुसार मीठ घालून परतावे. मिश्रण ओलसर झाले की त्यात शिजवलेला भात घालून हलक्या हाताने ढवळावे.

बिडाचा तवा ( सिझलर चे पॅन ) मोठ्या आंचेवर ठेवावा. त्यावर कोबीची पाने सोडवून लावावीत. नंतर त्यावर तयार केलेले पॅटीस व तयार मिश्रण पसरावे. बिडाचा तवा तापला की कोबीची पाने किंचित करपल्याचा वास येऊ लागेल, मग त्यावर एक चमचा तूप टाकावे. तुपामुळे सुंदर सुवास येईलच, शिवाय खुमारी वाढेल तसेच थोडा धूर निघू लागेल. लागलीच वाढावे.

टीपा
तूप घालायचे नसेल त्यांनी चमचाभर व्हिनीगर टाकावे. परंतु तुपामुळे अप्रतिम चव येते. हे असे चुरचुरणारे, धूर येणारे सिझलर पाहुण्यांसमोर आणलेत की त्याच्या सुंदर वासाने व दृष्यस्वरूपाने सगळेच खूश होतील.