शेव बटाटा पुरी

जिन्नस

• दोन मोठे बटाटे उकडून हातानेच कुस्करून घ्यावेत
• एक मोठा कांदा व एक मोठा टोमॅटो बारीक चिरून
• एक वाटी घट्ट दही
• एक वाटी साधी/नायलॉन शेव
• मूठभर कोथिंबीर बारीक चिरून
• चाळीस पन्नास पुऱ्या ( खाताना मोजू नये असे आई सांगत असे )
• हिरवी चटणी, आंबट गोड चटणी व लसणाची चटणी

• पुऱ्यांसाठी- दोन वाट्या सेमोलिना पीठ ( इथल्या इंडियन स्टोअर्स मध्ये मिळते ) नसल्यास दोन वाट्या मैदा व एक वाटी रवा
• एक क्लब सोड्याची बॉटल/कुठलाही पिण्याचा सोडा
• चवीपुरते मीठ
• एक चमचा कडकडीत तेल( -मोहनाकरीता

• हिरव्या चटणीकरीता - एक वाटी चिरलेली कोथिंबीर, चार/पाच तिखट हिरव्या मिरच्या, बारा-पंधरा पुदिन्याची पाने, एका लिंबाचा रस, एक चमचा चाट मसाला व चवीपुरते मीठ - मिक्सरमधून काढावे.
• आंबट-गोड चटणीकरीता - दहा/बारा खजूर, लिंबाएवढा चिंचेचा कोळ( तीन चमचे ), चार मध्यम गुळाचे खडे, एक चमचा धनेजिरेपूड, अर्धा चमचा लाल तिखट, पाव चमचा शेंदेलोण ( सैंधव ) - मिक्सरमधून काढावे.
• लसूण चटणीकरीता - आठ/दहा लसूण पाकळ्य़ा, तिन चमचे लाल तिखट व चवीपुरते मीठ - मिक्सरमधून काढावे.

मार्गदर्शन

प्रथम सेमोलिना पिठात/मैदा-रव्याच्या मिश्रणात चवीपुरते मीठ व एक चमचा कडकडीत मोहन घालून एकत्र करून त्यात क्लब सोडा घालून घट्ट भिजवावे. तासाभराने मिश्रण कुटावे किंवा मिक्सरमधून काढावे. कढईत प्रथम तेल नीट तापवून नंतर गॅस मध्यम ठेवून छोट्या छोट्या पुऱ्या बदामी रंगावर तळून घ्याव्यात. पुऱ्या चांगल्या तळल्या जायला हव्यात नाहीतर मऊ पडतात. ओव्हन असल्यास २०० डिग्रीवर प्रीहीट करून बंद करावा व त्यात या तळलेल्या पुऱ्या ठेवाव्यात म्हणजे एकदम कुरकुरीत व फुगलेल्या राहतात.

कोथिंबीर, मिरची, लसूण, पुदिना, लिंबू, चाट मसाला व चवीपुरते मीठ घालून हिरवी चटणी तयार करून घ्यावी.

खजुराचे तुकडे करून त्यात अर्धी वाटी गरम पाणी घालून पाच मिनिटे झाकून ठेवावे. नंतर त्यात गूळ, चिंच, धनेजिरेपूड, लाल तिखट व शेंदेलोण( सैंधव ) घालून आंबटगोड चटणी करून घ्यावी.

लसूण बारीक चिरून त्यात तीन चमचे लाल तिखट व चवीनुसार मीठ व जरूरीपुरते पाणी घालून लसणाची ओली चटणी करून घ्यावी.

एका बशीत तळलेल्या सात/आठ पुऱ्या अलगद पोट फोडून ठेवाव्यात. पुरीत प्रथम बटाटा-कांदा-टोमॅटो-दही-शेव- हिरवी चटणी-लसूण चटणी-आंबटगोड चटणी घालून त्यावर कोथिंबीर टाकावी. आवडत असल्यास वरून चाट मसाला भुरभुरून लागलीच गट्टम करावी.

टीपा

पुऱ्या विकत आणल्या तर एक काम कमी व चुकण्याची भीती नाही.

चटण्या अती घट्टही नकोत आणि पाणीदारही नकोत.

दही शक्यतो घट्ट असावे. पातळ असल्यास काही वेळ फडक्यावर घालून पाणी काढून टाकावे.

चटण्या घालताना सढळ हाताने घालाव्यात. पुदिना-मिरची-लिंबांची चव, आंबट-गोड व लसणाची सणसणीत चव मस्त जाणवायला हव्यात. बटाटा गरम असेल तर अजून छान. बटाट्याऐवजी रगडाही वापरता येईल. मात्र तो गरमच हवा, रगड्याचीही सुंदर लागते.

एकदम पाहता बरीच तयारी करावी लागणार असे वाटून थोडे दडपण आल्यासारखे होईलही परंतु एकदा का पहिली शेवबटाटापुरी तोंडात गेली की मग सगळे श्रम वसूल आणि बस खाते जाव.... खाते जाव......