प्रिय वाचकपरिवार व मित्र-मैत्रिणी यांस.......

प्रिय वाचकपरिवार व मित्र-मैत्रिणी यांस,

नवीन वर्ष सुरू होऊन सात तारीख उजाडली तरीही माझ्या सगळ्या वाचकांना, मित्र-मैत्रिणींना, सगेसोयऱ्यांना शुभेच्छा देता आल्या नव्हत्या. फार चुटपूट लागून राहिली होती. गेले दहा-बारा दिवस भटकंती सुरू असल्याने जालावरचा वावर अगदीच नाममात्र होता. काल रात्री घरी परत आलो. नेहमीप्रमाणे गमतीजमती, फिरणे, फोटो अन मस्त खादडंती झालेली आहे. ट्रीपला जायचे या विचारानेच मी अतिशय खुशाळते त्यात या सहलीत लेकही बरोबर होता. दुधात साखर. फोटू-बिटू टाकतेच आता लगेहाथ. पण सगळ्यात प्रथम शुभेच्छा देते.

" प्रिय वाचकपरिवार, मित्र-मैत्रिणी व आप्तस्वकीय सगळ्यांना नववर्षाच्या मनःपूर्वक शुभेच्छा! हे नवीन वर्ष अनेक सुखदायी घटनांनी, मंगल प्रसंगांनी, प्रेम-जिव्हाळा-सलोख्याने, मैत्रीने युक्त असावे." खरे तर हे सगळे भाव आपल्या सगळ्यांच्या मनात नेहमीच असतात फक्त प्रत्येकवेळी ते बोलून दाखवले जात नाहीत. या निमित्ते ती संधी साधून घेत आहे. गेल्या वर्षात वैयक्तिक बोलायचे तर मला खूप मैत्रपरिवार मिळाला- प्रेम मिळाले. आवर्जून नेहमीच वाचणारे - संवाद साधणारे अनेक वाचक लाभले. वर्ष संपता संपता " नेटभेट मासिकात " काही लेख छापून आले. नेटभेट- सलिल व प्रणवचे खूप आभार व अभिनंदन. वर्ष सुरू होतानाच भुंगाने काढलेल्या " पोटोबा " या ई-बुकात पाककृती प्रसिद्ध झाल्या. भुंगाच्या या उपक्रमाबद्दल अभिनंदन व अनेक आभार. मी ट्रीपला गेलेली असल्याने माझ्याकडून वाचकांना ते कळवले गेले नसले तरीही अनेकांनी तत्परतेने ई-बुक आवडल्याचे कळवले. त्याबद्दल सगळ्यांचे खूप खूप आभार. साईडबार मध्ये " ई-बुक - पोटोबाचा " दुवा टाकला आहे. आशा आहे पाककृती एकाच ठिकाणी उपलब्ध झाल्याने सोय होईल. पाककृती लिहिताना बरेचदा मला वाटत असे की हे कोण वाचत असेल...... खाण्यावर प्रेम करणारे सगळेच असले तरीही. परंतु अनेक जणांनी पाककृती सहज-सोप्या असून उपयोगी असल्याचे लिहिले त्यामुळे बरे वाटले. उत्साह वाढला.

पोटोबा - १: चाळीस पाककृतीं साधं - सोपं पुस्तक!
डाऊनलोड करण्यासाठी समोरच्या पुस्तकावर क्लिक करा!
"पोटोबा"चं पहिलं "ई-बुक" भाग्यश्रीच्या मदतीशिवाय शक्य नव्हते.
चला तर मग - खादाडी सुरु करुया!

( डाऊनलोड करण्यासाठी साईडबार मधील दुव्यावर कृपया टिचकी मारा. धन्यवाद. )

नवीन वर्षात मायदेशाची वारी लवकर घडावी म्हणजे बऱ्याच जणांना भेटता येईल, धमाल करता येईल. मैत्री आहे ती अजूनच वाढीस लागेल. नव वर्षाचे संकल्प अनेक जणांनी केले असतलीच, मनात काही आशा-आकांक्षा बाळगल्या असतील, काही ठाम निश्च्ययही केले असतील ते सारे संकल्प तडीस जातीलच याची खात्री आहे. लोभ आहेच तो वाढावा, स्नेह नेहमीच राहावा हीच इच्छा आहे.

आपली
भाग्यश्री